25, అక్టోబర్ 2020, ఆదివారం

అమ్మకు ప్రేమతో - మా అమ్మాయి వీణాధరి నాకు ప్రేమతో రాసిన ఉత్తరం - 4


 

మా అమ్మాయి వీణాధరి నాకు ప్రేమతో రాసిన ఉత్తరాలు

అమ్మా...

ఎలా వున్నావు.. రాత్రి ఎంతకీ నిద్రపట్టలేదు. నిన్ను, చిన్నప్పుడు నువ్వు చెప్పిన కథలు తలుచుకుంటూ పడుకున్నాను. నువ్వేమో మా ఇద్దరినీ చెరొక పక్కా పడుకోపెట్టుకుని కథలు చెప్పేదానివి. పగలంతా ఇంట్లో పని, ఆఫీసులో పని చేసుకుని వచ్చి బాగా అలిసిపోయేదానివి.
కానీ మాకు అన్నం పెట్టేటప్పుడు, పడుకునేటప్పుడు మాగాయముక్క రాక్షసుడి కథ, అరేబియన్ నైట్స్ - సోమరిపోతు హసన్ కథ - ఇనప అత్తగారు, అత్తగారు కాకరకాయలు ఎన్నికథలు చెప్పేదానివమ్మా...! నాకు సడన్ గా ఇనప అత్తగారి కథ గుర్తుకు వచ్చింది.
ఆ కథ తల్చుకుంటే బలే నవ్వు వచ్చింది. అసలు కోడళ్ళు అలా భయపడతారా...? అప్పటి కోడలు కదా...! అత్తగారంటే కోడలికి విపరీతమైన భయమని - అత్తగారు తను చచ్చిపోతే పెట్టుకోమని తన బొమ్మ ఒకటి ఇనుముతో చేయించి ఇస్తుందని - అత్తగారు పోయాక కూడా ఆ బొమ్మని చూసి భయపడుతుందని - అత్తగారి బొమ్మకి ఏం పెట్టకుండా తను తినేది కాదని చెప్పావు. ఒకసారి కోడలు తిరణాలకి వెడుతూ అత్తగారి బొమ్మని తీసుకెడుతుందని చెప్తూనే నిద్రపోయావు.
మేమిద్దరం నువ్వలా నిద్రపోయేసరికి ఏం చెయ్యాలో తెలియక అమ్మా కథ చెప్పు అని లేపాం. నువ్వేమో ఏం కథ... ఆ... హసన్ కథ కదా...! అన్నావు. నేను అత్తగారి కథమ్మా అన్నాను. నువ్వేమో పాపం నిద్రమత్తులో ఆ... హసన్ అత్తగారితో వెళ్ళిపోయాడు అన్నావు.
మేమిద్దరం బాగా నవ్వాం. నువ్వు సగం సగం కళ్లు తెరిచి ఎందుకు నవ్వుతున్నారు రేపు చెప్తాలే మిగిలిన కథ అని మళ్ళీ నిద్రపోయావు.
పొద్దున్న లేచాక నీకు నీ మాటలు చెప్తే... బాగా నవ్వావు. అయ్యో మొత్తం కథ చెప్పలేదా నేను. సారీ బాగా నిద్రొచ్చేసింది. ఇవాళ సరిగ్గా చెప్తాలే అన్నావు. నువ్వు కథ చెప్తుంటే అందులోకి వెళ్లిపోయేవాళ్ళం.
అమ్మా... నీ చేత మళ్ళీ కథలు చెప్పించుకోవాలి. చిన్నుగాడు కుడా అదే అంటున్నాడు.
నిన్ను తలుచుకుంటూ... నీ కథలు నెమరేసుకుంటూ నిద్రపోతా...

కామెంట్‌లు లేవు:

కామెంట్‌ను పోస్ట్ చేయండి