మా అమ్మాయి వీణ ఎమ్మెస్ చెయ్యడానికి ఆస్ట్రేలియా వెళ్ళేముందు సకుటుంబ సమేతంగా ఒక పది రోజులు యాంత్రిక జీవితాన్ని పక్కన పెట్టి గోదావరి జిల్లాల పర్యటనకి వెళ్ళాం. వాళ్ళు ఏ పల్లెటూరు చూడలేదు.
మా ఈ పర్యటనలో…
చిన్నప్పుడు మేము తిరిగిన ఊళ్ళు, మా మధుర జ్ఞాపకాల ఆనవాళ్ళు చూపించాను.
వాళ్ళ వయసుని మర్చిపోయి పసిపిల్లల్లా ఆడారు, తిరిగారు. మాతోబాటు వాళ్ళ ఫ్రెండ్ శ్యామ్ కూడా వచ్చాడు. ఇలాంటి పర్యటనలు కూడా వుండాలేమో అనిపించింది.
మొదటగా మా అమ్మ పుట్టిన వూరు గురించి చెప్తాను. ఈ ఊళ్లో చాలా జ్ఞాపకాలున్నాయి.
ఊరు చిన్నదే వెళ్ళేదారి మాత్రం ప్రశాంతంగా పారుతున్న కాలువ. కాలువకి కాలువ గట్టుమీద పెద్దపెద్ద పచ్చని చెట్లు కాలువ మీదకి వంగి కాలువతో కబుర్లు చెబుతూ... గాలికి అటూ ఇటూ వూగుతూ కాలువని స్పృశిస్తూ... అప్పుడప్పుడు ఎగసి పడే కాలువతో ఆనందం పంచుకుంటూ వుంటాయి.
ఊరిపేరు ఏలేటిపాటు - (ప.గో.జిల్లా) తణుకుకి 16 కి.మీ. 20ని. ప్రయాణం
ఆ వూరు అమ్మ పుట్టిన వూరు
ఆ ఇల్లు అమ్మ పుట్టిన ఇల్లు
మేనమామలు, అత్తల ఆప్యాయతల మధ్య అమ్మ పెరిగింది.
అమ్మ లేదు. అమ్మని పెంచిన మామలు, అత్తలు లేరు.
కానీ ఇప్పటికీ ఆ ఊరు ఆప్యాయంగా చేతులు జాపుతుంది, ఆహ్వానిస్తుంది.
తరువాతి తరం వారు అంతే ఆప్యాయత చూపిస్తున్నారు.
చాలా ఆనందంగా అనిపించింది.
వాళ్ళ ఆప్యాయతలకి మా పిల్లలు ఉక్కిరిబిక్కిరి అయ్యారు.
ఈ ఇంటి వెనక పచ్చని పంట పొలాలు. ఆహ్లాదకరమై వాతావరణం. ప్రపంచాన్నే మర్చిపోవచ్చు.
పల్లె జ్ఞాపకాలు, ముఖ్యంగా మన బాల్యంతో ముడిబడినవి, ఎప్పటికీ మధురంగానే ఉంటాయి.
రిప్లయితొలగించండి