పిల్లలు దూర దేశాలకి వెళ్ళినప్పుడు అమ్మకి ప్రేమతో రాసిన ఉత్తరాలు ఇవి....
పిల్లలు పుట్టిన దగ్గరనుంచీ వాళ్ళ అల్లర్లు, పేచీలతో ఎన్నో ముచ్చట్లు ఉంటాయి. ఆ ముచ్చట్లలో ప్రేమ వుంటుంది, మనం తట్టుకోలేని నవ్వు వుంటుంది, వీళ్ళు ఇలా ఎందుకు చేస్తున్నారనే ఆలోచన, దాంట్లో మనం నేర్చుకునే పాఠం వుంటుంది. పిల్లలు పెద్దవాళ్ళయి వాళ్ళ వృత్తి రీత్యా కానీ, వివాహం అయి కానీ దూరంగా వున్నప్పుడు వాళ్ళు వాళ్ల చిన్నప్పటి విషయాలన్నీ తల్లితండ్రులతో పంచుకుంటే అంతకన్నా ఆనందం ఏముంటుంది? దాన్నే ఈ రకంగా ప్రారంభించి వీలైనప్పుడల్లా మా పిల్లల ముచ్చట్లు మీతో పంచుకుందామనుకుంటున్నాను!
అమ్మా!
నీకు చాలా రోజుల నుంచి ఉత్తరం రాయాలనుకుంటున్నాను. ఎప్పుడూ ఆఫీసు, ఇల్లు! నేను, చిన్నుగాడు పుట్టేముందు, పుట్టాక నువ్వు చెప్పిన నీ అనుభవాలు గుర్తుకు వచ్చాయి. అంతేకాకుండా మేమిద్దరం చిన్నప్పటి నుంచి ఆడిన ఆటలు, చదువులు, స్నేహితులతో మా అనుభవాలు, స్కూలు రోజులు, కాలేజీ రోజులు మొత్తం అన్నీ నీకు ఉత్తరం రాస్తే ఎలా వుంటుంది అనిపించింది.
నేను పుట్టేముందర, పుట్టిన తర్వాత విషయాలు నీకు గుర్తున్నా నేను వాటిని మధుర జ్ఞాపకంలా నీతో పంచుకుందామనుకుంటున్నాను.
అమ్మా! నేను పుట్టేముందర నీ పొట్టలో అటూ ఇటూ కదిలేదాన్నని, ఆ కదలికలు మరీ ఎక్కువ వుండేవి కావు, బుద్ధిమంతురాల్ని అనుకున్నానని చెప్పావు. కానీ రోడ్డు మీదకి వెళ్ళినప్పుడు మాత్రం బస్సు హారన్ కి ఉలిక్కిపడటం నీకు ఆశ్చర్యం కలించిందన్నావు. అంటే ఏదైనా శబ్దాలకి మాత్రం బాగా స్పందించడం చూసి నువ్వు పాటలు పాడుతూ వుండేదానివి కదూ! నీ పొట్టలో వుండి పాటలు వింటూ కాళ్లూ, చేతులూ కదిపేదాన్నని, అదే కారణంగా నేను సంగీతం నేర్చుకుని రాష్ట్ర స్థాయిలో, దేశ స్థాయిలో బహుమతులు గెల్చుకున్నానని చెప్పిన విషయం నేను మర్చిపోలేదమ్మా! నేను, చిన్నుగాడు ఎన్నో విషయాలు రాసి నీకు, నాన్నకి ఆనందం కలిగించాలి.
ఇప్పటికి వుంటాను.
ప్రేమతో....
కామెంట్‌లు లేవు:
కామెంట్‌ను పోస్ట్ చేయండి