కొత్త జీవితం ప్రారంభమైంది - 46 మళ్ళీ ఆఫీసు పనులు - ప్రారంభమైన యాపిల్ కంప్యూటర్ల యుగం

కొత్త జీవితం ప్రారంభమైంది - 46  మళ్ళీ ఆఫీసు పనులు - ప్రారంభమైన యాపిల్  కంప్యూటర్ల యుగం

 మా ఆఫీసులో వర్కు ఎప్పుడూ ఆగకుండా నడుస్తూనే వుంది. అప్పుడప్పుడు కస్టమర్స్ వచ్చినప్పుడు వాళ్ళకి ప్రూఫ్ రీడింగ్ కూడా చేసి పెట్టమని అడుగుతారు. మామూలు రొటీన్ లో పడ్డాం. ఆగని కాలం. విషాదాన్ని నింపిన 1987 వెళ్ళిపోయి 88 వచ్చేసింది.

*** ఏదైనా మనమంచికే (అమ్మ చెప్పింది కదా...) ***

*** కొత్త టెక్నాలజీని ఆహ్వానించిన తెలుగు అకాడమీ ***

నేను అప్పుడే ఆఫీసుకి వచ్చి నా రూములోకి వెళ్ళబోతున్నాను, తెలుగు అకాడమీ నుంచి ఒక ఆఫీసరు దామరాజు హరి వాసు గారు వచ్చారు. ఆయన వస్తూనే మా రూము దగ్గిరకి వచ్చి బయట కూచున్నారు. నేను కంప్యూటర్ ఆన్ చేసి వచ్చి -

“ఏం కావాలి సర్?” అన్నాను.

“అమ్మా.... తెలుగు అకాడమీలో కొత్తగా యాపిల్ కంప్యూటర్లు తీసుకువచ్చాం. దానికి ఎక్సపీరియన్స్, తెలుగు బాగా వచ్చిన ఆపరేటర్లు కావాలి. నువ్వు చాలా రోజుల నుంచీ చేస్తున్నావు కదా... మా ఆఫీసులో ఉషాపన్నాల గారి గోండు భాష పుస్తకం చేశారు కదా... ఆవిడ కూడా నీకు కంప్యూటర్స్ గురించి చెప్పమన్నారు. రేపు ఒకసారి మా ఆఫీసుకి రా... ఇంకెవరైనా వుంటే కూడా చెప్పు” అన్నారు. అసలు అవేంటో చూడాలని ఆత్రం.

(*** గోండు భాష అదిలాబాద్ బస్తర్ జిల్లాలో గిరిజనులు మాట్లాడే భాష గోండు. ఉషాపన్నాల గారు ఆ భాషలో ఆ ప్రాంతానికి వెళ్ళి పరిశోధించి పుస్తకం రాశారు. చేసినప్పుడు చాలా తమాషాగా అనిపించేది. ఎడ్కి = జ్వరము, పిర్ = వాన, మర్మి = పెండ్లి, పాడి = ఇంటి పేరు, నాడి = రేపు, నర్ క = రాత్రి, సక్ రే = ప్రొద్దున, , రోన్ = ఇల్లు, సమ్దిర్ = అందరు, కరుమ్ = దగ్గర, యేర్ = నీరు, గాటో = అన్నం, కై కాల్ = కాలు చేతులు, మంత = ఉంది, సిల్లె = లేదు, బత పొరోల్? = ఏమి పేరు?, గాటో తిత్తికీ ?= అన్నం తిన్నవా? ఉద = కూర్చో ........ ఇలా వుండేవి. సరదాగా అప్పుడప్పుడూ మాట్లాడుకుంటూ, నవ్వుకుంటూ ఉండేవాళ్ళం. ***)

మర్నాడు విజయపాల్ గారికి చెప్పాను. ఒక గంట సేపే కాబట్టి ఆయన ఏమీ అనలేదు. తెలుగు అకాడమీకి వెళ్ళాను. మూడు మాకిన్ తోష్ క్లాసిక్ కంప్యూటర్లు వున్నాయి. అతి చిన్న కంప్యూటర్లు ముద్దుగా వున్నాయి.

***ఫోటోలో చూపించినట్లు ***

*** చిన్న కంప్యూటర్లు వాటి ఫ్లాపీలు కూడా చిన్న చిన్నవిగా పట్టుకునేందుకు వీలుగా వున్నాయి. ***

ట్రైనింగ్ ఇవ్వడానికి ఒకతను వచ్చాడు. చెప్తున్నాడు. కొంచెం అర్థం అయ్యీ అవకుండా వుంది. మొత్తానికి తెలుగుకోగలిగాను.

హార్డ్ డిస్క్ కెపాసిటీ 250 ఎంబి. అదే మూడు సిస్టమ్స్ కి షేర్ చేస్తారు. అంటే ఒకో దానికి 80 ఎంబి అన్నమాట. విచిత్రంగా అనిపించింది. ఎప్పటికప్పుడు ఫ్లాపీల్లో మేటర్ కాపీ చేసేసుకోవాలి. లేకపోతే సిస్టమ్ స్లో అవుతుంది. ఒక సిస్టమ్ నుంచి తెలుగు ప్రింట్ ఇవ్వాలంటే మెయిన్ సిస్టమ్ నుంచి తెలుగుకి సంబంధించిన ప్రోగ్రాం ప్రింటర్ కి అందచెయ్యాలి. అప్పుడే ప్రింట్ వస్తుంది. తెలుగు స్క్రీన్ మీద స్పష్టంగా కనిపిస్తుంది. కొత్త విప్లవంలో భాగస్వాములయ్యే అవకాశం.

రెండు రోజులు అయ్యాక మా చెల్లెలు ప్రభావతికి కూడా రమ్మని చెప్పాను. తను చేస్తున్న కందనాతి చెన్నారెడ్డి గారి ఆఫీసులో లీవు పెట్టి వచ్చింది. మొత్తానికి వారం రోజుల్లో నేర్పించారు. ఇంకెన్నాళ్ళు రావాలో తెలియదు. కంప్యూటర్ గురించి పూర్తిగా నేర్చుకున్నాక నన్ను, మా చెల్లెలు ప్రభావతిని పిలిచి “మీ ఇద్దరూ అక్కచెల్లెళ్ళు కదా... ఒకళ్ళనే తీసుకుంటాం. ఎవరుంటారో ఆలోచించుకోండి” అన్నారు.

నాకు వెంటనే నిర్ణయాలు తీసుకోవడం అలవాటు కదా... నేను ఒక పది నిమిషాలు ఆలోచించి నేను వెళ్ళిపోతాను అని చెప్పాను. ఆ టైములో ఆ జాబ్ వస్తే నాకు ముందు ముందు బావుంటుందని కానీ, గవర్నమెంట్ జాబ్ వదిలేస్తున్నానని కానీ ఆలోచన రాలేదు. నేను ఆలోచించినది ఒక్కటే – నాకు పెళ్ళయిపోయింది. నేను జీవితంలో సెటిల్ అయ్యాను.

ఇంకా చెల్లెలు ప్రభావతికి ఎటువంటి సెటిల్ మెంటు లేదు. ఆ ఉద్యోగం వస్తే... తను తర్వాత ఉన్న ఇద్దరు చెల్లెళ్ళు ఇద్దరూ సెటిల్ అయ్యేవరకు సపోర్టు గా వుంటుందనిపించింది. గీతా ఇంకా ఇంటరు చదువుతోంది. అంతే బయటికి వచ్చేశాను. ఇంటికి వచ్చి మా వారికి చెప్పాను. నా నిర్ణయం ఎలా వున్నా – ఆయన కూడా నా నిర్ణయానికి ఎటువంటి అడ్డూ చెప్పలేదు. ఆయన నాకు సహకరించినందుకు చాలా సంతోషంగా అనిపించింది. ఆయన ఏమాత్రం నాకు అడ్డు చెప్పినా పరిస్థితులు ఎలా వుండేవో. అంతా మంచికే జరిగింది అనిపించింది.

ప్రభావతి తర్వాత ఆ జాబ్ పర్మనెంట్ అవడంలో ఏవో కొన్ని సమస్యలు ఎదుర్కొన్నా... ఒక మంచి ఉద్యోగంలో సెటిల్ అయ్యింది. నేను ఎప్పటికీ అక్కడ చేరలేదని బాధపడలేదు. నేనూ అక్కడే వుండి వుంటే... ఎంతోమంది ప్రముఖులతో పరిచయాలు అయ్యేవి కాదు, వాళ్ళ పుస్తకాలు చెయ్యగలిగేదాన్ని కాదు. వాళ్ళ నుంచి నేర్చుకున్న వాటితో మా పిల్లలిద్దరికీ ఎన్నో జీవిత పాఠాలు నేర్పాను. వాళ్ళు బుజ్జి బుజ్జి అడుగులు వేస్తున్నప్పటి నుంచీ నేను ఎక్కడి వెళ్ళినా నాతోనే వున్నారు. ఇదంతా మళ్ళీ ఒక కథే. ఏదైతేనేం వాళ్ళు జీవితంలో రాటుదేలేలా చెయ్యగలిగాను.

***

*** ప్రపంచంలో యాపిల్ పర్సనల్ కంప్యూటర్స్ విప్లవం - 1986 ***

యాపిల్ కంపెనీ అప్పటి వరకూ అతిచిన్న కంపెనీగా వున్న యాపిల్ కంపెనీ ఐబియమ్, మైక్రోసాఫ్ట్ లాంటి పెద్ద పెద్ద డిజిటల్ కంపెనీలతో పోటీ పడాలనుకుంది. ప్రపంచంలో పర్సనల్ కంప్యూటర్స్ తో డిజిటల్ విప్లవ సమాచారాన్ని అందించడానికి నాంది పలికింది. కంప్యూటర్లని రోజువారీ జీవితంలో భాగం చేసింది. స్టీవ్ జాబ్స్, స్టీవ్ వాజ్నియాక్ ఇద్దరూ సహ వ్యవస్థాపకులు యాపిల్ కంప్యూటర్స్ తో విప్లవాన్ని తీసుకువచ్చారు. ఇండియాకి వచ్చేసరికి దాదాపు మూడు సంవత్సరాలు పట్టింది.

*** ఆంధ్రప్రదేశ్ లో యాపిల్ కంప్యూటర్ల సంచలనం***

హైదరాబాదులో ఉన్న మందలపు రాఘవరావు గారు ఈ కంప్యూటర్ల డిస్ట్రిబ్యూషన్ తీసుకుని ఆంధ్రప్రదేశ్ ని అంతా యాపిల్ కంప్యూటర్స్ తో పెద్ద సంచలనం తీసుకు వచ్చారు. మా ఇంకో చెల్లెలు గాయత్రి నా దగ్గిర కంప్యూటర్ నేర్చుకున్న అనుభవంతో ఆయన ఆఫీసులో చేరి మార్కెటింగ్ మేనేజర్ గా వుండి కంప్యూటర్ సేల్స్ పెరగడంలో చాలా సహకరించింది.