*** శరీరం సహకరించకపోయినా.... ఆత్మస్థైర్యమే ఆయనకి బలం *** - 66
*** కోడూరు పుల్లారెడ్డిగారు అవిశ్రాంత రచయిత ***
మా ఫ్రెండ్ తో కలిసి పుల్లారెడ్డిగారి అబ్బాయి గృహప్రవేశానికి వెళ్ళాను. నాకు అప్పటి వరకూ ఆయన కానీ, అమ్మాయి, కోడలు పరిచయం లేరు. అందరూ బాగా మాట్లాడారు. చాలా మర్యాదగా, అభిమానంగా మాట్లాడారు. ఆయన్ని చూస్తే నాకు ఆశ్చర్యం వేసింది. నడవలేని పరిస్థితిలో ఉన్నారు. కర్రలు పట్టుకుని నడుస్తున్నారు. నా ఫోన్ నెంబర్ అడిగి తీసుకున్నారు. ఒకరోజు ఫోన్ చేసి మా ఇంటికి వచ్చారు.
ఆయనకి కొన్ని అనారోగ్య కారణాల వల్ల నడవలేని స్థితి వచ్చింది. సహాయం లేనిదే నడవలేరు, లేవలేరు, కూచోలేరు. డ్రైవర్ కమ్ అసిస్టెంట్ రాజు ఆయన ఇంట్లోనే కుటుంబంతో ఉండి ఆయనకి అన్ని రకాలుగా సహాయం చేస్తుంటాడు. రాజు చాలా ఓపికమంతుడు. ఈరోజుల్లో ఎంత డబ్బులిచ్చినా పని ఎగ్గొట్టి వెళ్ళిపోతారు. కానీ సంవత్సరాలుగా రాజు ఆయన్ని కనిపెట్టుకుని ఏ అవసరానికైనా ఆయన వెంట ఉంటాడు. మనం కోపంగా మాట్లాడినా అతను మాట్లాడడు. అంత చిన్న వయసులో ఆ ఓపిక ఎలా వచ్చిందా అనిపిస్తుంది. పుల్లారెడ్డిగారు అదృష్టవంతులు.
పుల్లారెడ్డిగారు ఇటువంటి పరిస్థితిలో ఉండి పుస్తక రచన చేస్తున్నారు. రాయలేని స్థితిలో వుండి కూడా *** 'ప్రాచీన ప్రపంచ ప్రసిద్ధ శిల్ప, చిత్రకారులు' *** గురించి ఒక చక్కటి పుస్తకాన్ని తయారు చెయ్యాలనే గట్టి సంకల్పంతో నాకు 2016 నుంచి మా ఇంటికి వచ్చి రోజుకి కొంత కొంత పక్కన కూచుని చెప్తుంటే నేను టైపు చేస్తున్నాను. గొప్ప గొప్ప చిత్రకారుల గురించి ఓపికగా మేటర్ తయారు చేశారు. అది ఒక రిఫరెన్స్ పుస్తకంగా రావాలని ఆయన కోరిక. ఇది కాకుండా మధ్య మధ్యలో ఏవో వ్యాసాలు, లెటర్లు కూడా చేయించుకుంటారు.
నేనే మీ ఇంటికి వస్తాను. కంప్యూటర్ ఏర్పాటు చేసుకోండి అని చెప్పాను. కానీ ఆయన కదలకుండా కూచుంటే అనారోగ్యం ఎక్కువవుతుందని. ఎంత ఓపిక లేకపోయినా వచ్చి పనిచేయించుకుంటారు. ఆయన ఆరోగ్యం బాగాలేదని చెప్పినప్పుడు నేను వెళ్ళి పలకరించి వస్తుంటాను.
ఎంత ఓపిక లేకపోయినా ఆయన అలా రావడంతో నేను ఆయనకోసం టైము కేటాయించుకుంటాను. నేను మధ్యలో రెండుసార్లు ఆస్ట్రేలియా వెళ్ళడంతో... పుస్తకం కొంచెం ఆగినప్పటికీ... మొత్తానికి పూర్తయ్యింది. 700 పేజీల పుస్తకం. ఫోటోలు పెట్టే టైముకి కరోనాతో కొన్నాళ్ళు, మధ్యలో ఆయన అనారోగ్యంతో కొన్నాళ్ళు ఆగింది. ఇక మళ్ళీ ఇప్పుడు వచ్చి ఫైనల్ చేసుకుని ప్రింట్ కి ఇస్తానంటున్నారు. ఆయనకి వయసు వల్ల అనారోగ్యం వల్ల ఈమధ్య అసహనం, కోపం ఎక్కువైంది. ఆయన పరిస్థితిని అర్థం చేసుకుని నడుచుకోవడమే.... అనుకున్నాను. పుస్తకం పూర్తయితే చాలనిపిస్తుంది. మా అమ్మాయి ఎంగేజ్ మెంట్ కి వచ్చిన ప్రముఖులలో ఈయన ఒకరు. మా అమ్మాయి పెళ్ళికి, అబ్బాయి పెళ్ళికి కూడా ఆయన తనంతటతనే కారు ఇచ్చి, రాజుని కూడా మాతో పంపించారు.
ఎప్పుడైనా పని చెయ్యడానికి ఓపిక లేకపోతే పుల్లారెడ్డిగారిని తలుచుకుని ఆయనకన్నా ఎంతోచిన్నదాన్నయిన నేను ఇలా వుండకూడదని నన్ను నేను మోటివేట్ చేసుకుంటాను.
***
***అన్నను మించిన సోదరుడు ***
***
పుల్లారెడ్డి గారి సోదరుడు కోడూరు ప్రభాకర రెడ్డి గారు కూడా గొప్ప రచయిత.
అన్నదమ్ములిద్దరికీ ఒకరంటే ఒకరికి చాలా ప్రేమ. తమ్ముడి పుస్తకాలన్నీ ఓపిక లేకపోయినా పుల్లారెడ్డిగారు ప్రూఫ్ చేసిపెడతారు.
కోడూరు ప్రభాకరరెడ్డిగారు కడపలో ప్రముఖ పిల్లల వైద్యులు. వారి వైద్య వృత్తిలోనే కాకుండా సాహిత్య ప్రపంచంలో కూడా పేరు ప్రఖ్యాతులున్నాయి. పిల్లల ఆరోగ్యం కోసం అంకితమయినా కూడా ఆయనకి సాహిత్యంపట్ల ఉన్న అభిలాష, తెలుగు మీద ఆయనకి ఉన్న పట్టు, ఆయన పద్యరచనా వైశిష్ట్యం ఆశ్చర్యాన్ని కలిగిస్తుంది. ఆయన వైద్యుడా, తెలుగు పండితుడా అనిపిస్తుంది.
నేను ఆయన రచించిన నాలుగు పుస్తకాలు డిటిపి, ప్రూఫ్ రీడింగ్, కవర్ డిజైన్ చేశాము. చివరికి ప్రెస్ వాళ్ళ దగ్గర కూచుని ఫైనల్ గా ప్రింటింగ్ కి వెళ్ళేవరకు బాధ్యత తీసుకున్నాం. ప్రూఫ్ రీడింగ్ మేం చేసినా రచయితదే పైచెయ్యి.
1. "సాహితీ రసాయనం" - చక్కటి సాహిత్య వ్యాసాలతో రచించిన ఈ పుస్తకం పరిశోధకులకి చాలా ఉపయోగపడగలదు.
2."షేక్స్ పియర్ సానెట్స్" (భావగీతాలు) - షేక్స్ పియర్ భావగీతాల్ని చక్కటి సీసపద్యాల్లోకి అనువదించారు.
3."కీట్స్ కవితావైభవం" - కీట్స్ కవితల్ని తెలుగు భాషలోకి అందంగా, సరళంగా అనువదించారు.
4. "బాలల భాగవత కథలు" - అందరికీ బాగా అర్థమయ్యేరీతిలో భాగవత కథల్ని రచించారు. వాటికిబొమ్మలు పెట్టమని మాకు అప్పగించడంతో మేము ప్రతి కథకి బొమ్మలు పెట్టాము.
5. శ్రీనాథుని చాటువులు
ఇవి కాకుండా ఈయన రచనలు ఎన్నో ఉన్నాయి.
పుల్లారెడ్డిగారు, ప్రభాకర రెడ్డిగారు సాహిత్యంలో గొప్ప పేరున్న వ్యక్తులు. అన్నగారికి తమ్ముడు ప్రేమతో చేసిన సత్కార సభలో, నాకు కూడా సన్మానం చేశారు. నేను పుల్లారెడ్డిగారి గురించి మాట్లాడాను.
కామెంట్‌లు లేవు:
కామెంట్‌ను పోస్ట్ చేయండి